Acts 16

Timoti Paulo ma Sailasa 'i'wayabudiya

1Paulo ma Sailasa 'idi sakowasi 'oina sitauya Debi ma Lisitila, ma Lisitila 'oina Yesu 'ana tomuliya 'aigeda silobeya, sanina Timoti, tauna sinana wahine Yudiya. Sinanaina Yesu 'ana tohemisa, ma tamana hesi gwama Gilisi. 2Ma tohekalesiyao 'asa Lisitila ma Ikoniyami 'oidiya, Timotiina si'ahwa bwebwe'aneya 3ma Paulo nuwanuwana ma Timoti mahetediu sisakowasi, 'oinega 'ibwauweya ma 'wapina 'i'upweya Mosese 'ina loina gidemusa, ma 'abehega meYudiya Timotiina sihe'asisiyane, weyahina meYudiya tupwaina Lisitila 'oina sisanapuya 'abehega Timoti tamana gwama Gilisi.

4Ta sisakosakowasi 'asa 'aigeda 'aigeda 'oidiya, ma loinaina Yesu 'ana tohepwailao ma tohanugetao mwalo Yelusalema 'oina siloinaeya sihepwaileya 'asa mabwaiyadi 'oidiya, ma 'abehega loinaina simulimuliye. 5Coinega tohekalesiyao 'idi hemisa 'ihewaiwaiya, ma sabwelo 'aigeda 'aigeda 'oidiya 'adi boda 'imadomadou.

Paulo 'ina nihiyega gwama Masidoniya 'i'iteya

6Coinega Paulo ma 'iyanao tupwa Piligiya ma Galetiya 'alodiyega sitautau, ma Yaluyaluwa Tabuna 'i'ausidiya ma sahena Yehoba tetelina tupwa Esiya 'oina siloguloguguyae. 7Ma sinaoma Misiya ma sitohoya ma 'abehega Bitiniya 'oina siluhu, ta Yesu yaluyaluwana geya 'itagwaledi. 8Coinega Misiya si'ebesineya ma sidobiya Tilowasi.

9Eeta hinuwana si'eno'eno ma Paulo 'inihiya, ta 'ina nihiina beno loheya 'aigeda gwama Masidoniya 'i'iteya, 'itoholowa ma 'i'ahwa'ahwanoi Paulo 'oina, 'igwaegwae, “Cuhabalama Masidoniya 'oina ma 'u'abihetemai.”

10Paulo 'ina nihiina 'oinega 'asanapuya 'abehega Yehoba 'ibwauwemaiya ma tetela bwebwe'ana 'aguguyae meMasidoniya 'oidiya, 'oinega 'eda 'abesa sabi habala Masidoniya.

Wahine sanina Lidiya 'ihemisa Yesu 'oina

11Coinega waga 'alobeya ma Tilowasi 'oinega 'a'u'e, ma dumwaluna Samotilesi, ma nobwa 'a'enowa. Gona 'i'adaleya 'a'u'e hila ma Niyapoli 'oina 'asuluwa, 12ma Niyapoli 'oinega 'atauya Pilipai, tauna 'asa madouna tupwa Masidoniya 'alona, ma gogoina 'alona meLoma taumana baibaiwadi simiyamiya, nage 'oina 'amiya hila sabwelo tupwana 'oidiya.

13Ma Sabatiya 'asega 'alatuwa 'atauya 'aigeda we'aha papalina, tupwaina 'anuwatuhuya 'ebe lotapwalolo, ma 'oina 'amiyatoiya, ta wahiwahine si'eto'autama wete ba'idamayao 'ahehegwaegwaeya.

14Ma 'aigeda wahine 'oidiyega sanina Lidiya, 'asa Tayataila wahineina, ma Yehoba 'ana tohemisa, ta 'ina paihowa beno 'aigeda 'ale'o wasawasa 'ana tohegimwane. Ma wahiwahineyedi 'ima gwae sihehesagohedi, ma Yehoba hemisa Lidiya 'atena 'ilaguya, ma Paulo 'ina guguya 'ihemiseya, 15ma tauna ma'ina susuwao 'i'abihe babitaisowediya. Ta muliyetega 'i'ahwanoiyemaiya, 'igwae, “Babadao, wasanapugauwa 'abehega Yesu yahemisaeya moisa, 'oinega sowasowahina wanaoma ma wahetaumana 'igu hada?” Ta 'i'ohenemaiya, ma 'oinega 'atauya 'ina hada.

Paulo ma Sailasa 'adi lagu deli

16Hali sabwelo 'oina 'atautau tupwaina lotapwaloloina 'oina, ma babada tupwadi 'idi hewali gumalaulau 'alobeya, tauna hi'ahi'a 'iluhuwa solana ma 'oinega sowasowahina 'ihepwaila nugeta to'aha 'abwa 'ilatu, ta 'ina paihowa bewa 'oinega gumalaulauina 'ina babadao mane madouna si'ewa'ewa tomota 'oidiyega. 17Ta wahineina 'imulimuliyemai, ma 'iwuiwui, 'igwaeya, “Bewa tomotaedi Yehoba Tomiya tabwana hedada 'ina topaihowao, ma 'abihetena 'ana 'eda 'ana tohepwailao.”

18Gumalaulauina bewa gidemusa 'iwuiwui sabwelo baibaiwana 'oidiya, 'oinega Paulo wahina 'ilo'wata'wata, ma 'i'itehinowa, ma yaluyaluwaina 'ihegwaeya, 'igwae, “Yesu Keliso saninega yaloinego ma gumalaulau beno 'oinega 'ulatu.” Ma nage 'oina 'ihapwesa.

19Ma gumalaulauina 'ina babadao sigamwasowalemaiya, weyahina 'idi mane madouna 'ana 'ebeloba tauna gumalaulauina, ta Paulo 'i'abihe bwebwe'aneya. Coinega Paulo ma Sailasa si'abiyahidiya ma silisi dadanediya, ta sitauyediya 'ebehegimwane 'oina, ma sitoediya toloinao 'oidiya sabi yatalaedi, 20ta sihegwaediya, sigwae, “Bewa loheloheyaedi taudi meYudiya, ma sitauyama 'ida 'asa ta 'ada wahi'wata'wata silagulagu, 21weyahina hali mumuga sihehe'ita, beno tauda meLoma 'ida 'etoboda, ma sahena mumugaina tapaipaihowa.”

22Ta bodaedi wete bewa gidemusa sihe'ewediya, 'oinega toloinao siloinaediya, ma Paulo ma Sailasa 'adi 'ale'o 'oidiyega silolodiya, ta 'aiwe 'oidiyega sisapi dadanediya. 23Sihunu geyogeyoidiya 'igumwala, ma deliya silagu luhuwediya, ma deli 'ana to'itayahina siloinaeya ma 'ilomatayahi bwaibwaini. 24Coinega to'itayahinaina 'ana loina 'ihesagoheya, ta 'ilagu luguhediya deli 'alona moisa, ma wete 'ahedi 'i'ahuyahidiya 'aiwe madoudi 'oidiyega.

Paulo ma Sailasa sihapwesa ma deli 'ana to'itayahi 'inuwabuiya

25Ma hinuwana Paulo ma Sailasa si'ahwa'ahwanoi ta siwaliwali Yehoba 'oina, ta 'oinega toluhu deliyao mabwaiyadi sihehesagohedi, 26ma mwani'ini'i madouna 'ipiliya ta sisalutuwama, ma hada deli 'ana wahuwahu 'inihuwa, ta deliina 'ana 'ahwa'edao si'eso'ediya, ma 'oinega toluhuwedi 'ahedi 'adi paiyao si'elihasidiya siboidimo.

27Ta deli 'ana to'itayahina 'eno'enowega 'isalutuwama, ta 'ahwa'eda so'eso'edi 'i'itediya, ta 'ina nuwatuhu toluhuwedi sidena pwaiya, 'oinega 'ina 'elepa 'aleha 'i'eweya ta 'abehega 'iboi 'ida lohe'amasi hile.

28Ta Paulo 'i'iteyama, ma 'iwuiya, 'igwae, “Ciyagu, sahena 'uboi 'ulohelohe 'amasigo. Mabwaiyama bewa 'amiyamiya.”

29Coinega to'itayahinaina 'ina topaihowao 'oidiya 'ibwauwa ma mayale si'eweyama, ta mayale 'i'eweya, ma 'ipili ta 'iluhuwa ma'ina dedela, weyahina 'imatauta, ta 'ibe'u talutalubu'iya Paulo ma Sailasa matadiya. 30Ma muliyetega 'itoholo ta 'itoe latuhedima, ta 'igwae, “Babadao, wahegwaegau to'aha yapaihowa ma 'oinega Yehoba 'i'abihetegau?”

31Ma Paulo ma Sailasa sigwaeya, “Ceguma Bada Yesu 'oina 'uhemisa, nata 'owa ma'ino susuwao wete 'abihetena waloba.” 32Ta Badaina tetelina sihe'ote'oteteliya tauna ma'ina susuwao 'oidiya.

33Hinuwana nage 'oina 'itoe latuhediya ma 'adi gane ma bweyaha sapiyega silobeya 'ibuyodiya, ta tauna ma'ina susuwao sibabitaiso. 34Sibabitaiso ta 'itoediya tauna 'ina hada, ma 'oinega 'adiwa 'i'atububuya, ma si'aiya. Ta deli 'ana to'itayahinaina ma'ina susuwao siyaliyaya madouna, weyahina 'ina hemisa hauhauna Yehoba 'oina 'ilobeya.

35Gona 'i'adaleya ma toloinao 'idi topaihowao, gide polisi, sihewasediya deli 'ana to'itayahi 'oina ma siloineya 'abehega, “Loheya 'eluwaedi deliya 'alagu luhuwediya 'ulihasidi ma sitauya.” 36Coinega to'itayahiina deli 'alonega 'iluhuwa ma wasaina 'ihepwaileya Paulo 'oina, 'igwae, “Toloinao wasa sihewaseyama 'abehega yalihasigomi, 'oinega wahapwesama ma ma'imi yaliyaya watau.”

37Ma Paulo 'ilogwahata, 'igwaeya, “Sahena 'atautau. Weyahina geya 'aigeda 'ima puimo yatala 'oina siloba, ma boda matadiya sihunu dadanemaiya, ta deliya silagu luhuwemaiya, ma tauma hesi mwalo 'ahe Loma. To'aha weyahina 'abehega silihasimai ma sitoe latuhemai dahwanega? Ma 'ilobwainediya hesi taudi tuwa sinaoma ma sitoe hapwesemai.”

38Coinega polisiyedi sihila toloinao 'oidiya ma Paulo 'ina gwae sihepwaileya 'oidiya. Ta toloinaowedi sideba mwadina madouna, weyahina hepwaila bewa 'oinega sisanapuya 'abehega Paulo ma Sailasa sihe Loma. 39Coinega sinaoma deliya, ma 'atemuyemuyega sigwae helauwa Paulo ma Sailasa 'oidiya, ma deliyega sitoe hapwesediya, ta si'ahwanoiya 'oidiya, nuwanuwadi ma si'ebesinedi, sitauya hali 'asa.

40Ta Paulo ma Sailasa deliyega sitauya Lidiya 'ina hada, ma tohekalesiyao mahetediyao sihe'iya'iyagu ma siguguya 'oidiya, ma muliyetega sitauya.